Sunday 13 December 2020

මුලු හදින් මම ඇයට පෙම් කොට

https://www.youtube.com/watch?v=oAsjq7LhRho&fbclid=IwAR2dSuNgy5VW3YnxV8uiJU-jGkEQzYw7Gm0Ap_LnTRVHaift9loyZGNHqwU 


https://www.youtube.com/watch?v=FZPohAuNBC8

මුලු හදින් මම ඇයට පෙම් කොට අනාගත පෙම් සිහින මැව්වෙම් -නාරද දිසාසේකරයන් ගායනා කරන මෙම ගීතය මුල්වරට ප්‍රකාශයට පත් වූයේ එක්දහස් නවසිය පනස් ගණන් මැද භාගයේදී යැයි සඳහන්වේ. ළමා වියේ සිට මේ දක්වා  මෙම ගීතය අපගේ ජීවිතය පුරාවටම නොනස්නා රසාස්වාදයක් ලබාදුන් නිර්මාණයකි. මේ ගීතය වරක් පේරාදෙණි විශ්ව විද්‍යාලයේ පැවති ප්‍රසංගයකදී පෙු්ක්ෂක ඉල්ලීම මත දහදොලොස් වතාවත් ගායනා කරන්නට සිදුවූ පුවතක් මා අසා ඇත. ආදර විරහයකින් තැවෙන එක් පුද්ගලයෙකු මේ ගීතය ප්‍රචාරය වූ ගුවන් විදුලි යන්ත්‍රය පොරවකින් ගසා දෙකට පැලූ බවක් අසා ඇත්තෙමි. එදා මෙදා තුර  අංගොඩ මානසික රෝහලේ මානසික රෝගීන් වැඩියෙන්ම මිමිනූ ගීතය මෙය බවද කියවේ. 


මෙම ගීතයේ පදවැල දෙස බලන්න.


මුළු හදින් මම ඇයට පෙම් කොට

අනාගත පෙම් සිහින මැව්වෙමි

මගේ සොඳුරිය වෙනත් කෙනෙකුට

අයිති වුණු හැටි බලා දුක් වෙමි .



නිසංසල තැනකට වෙලා

හඩන මගෙ ඇස් දෙක දෙස බලා

කියන්නකෝ දෙවියනේ මේ දුක්

කොහොම ඉන්නද ඉවසලා

කොහොම ඉන්නද ඉවසලා


මගේ අත ගෙන කනට ළං වී

අනේ සුදු මම ආදරේ යැයි

කියන්නට සිතුනේ ඇයිද සුදු

නොසිතුවෙද මට දුක් ලැබේයැයි

නොසිතුවෙද මට දුක් ලැබේයැයි



නිදැල්ලේ තුරුලට වෙලා

රහස් එක එක කොඳුරලා

සිනාසුණු හැටි මතක් වෙනකොට

කොහොම ඉන්නද ඉවසලා

කොහොම ඉන්නද ඉවසලා


එදා රෑ ගං ඉවුර අසබඩ

සුපුන් සඳ පායන වෙලාවක

කතා කී හැටි මතක් වෙනකොට

දුක දැනෙයි පවතින අපායක


මෙහෙම ලෝකෙක ඉපදිලා

සිතෙහි අදහස් සුන් වෙලා

මා උපන්නේ දුක් විදින්නද

දුක් කඳුළු මැද තනිවෙලා

දුක් කඳුළු මැද තනිවෙලා


මුළු හදින් මම ඇයට පෙම් කොට


නාරද දිසාසේකර යම් හෙයකින් මෙම පදවැල ගීතයක්ව නොගයා ලියවිල්ලක් ලෙස ඔබ අතට පත් වී නම් ඔබට  ප්‍රේම විරහයෙන් ආතුරවූ පෙම්වතෙකුගේ සැබෑ ලසොව දැනවෙන ප්‍රකාශනයක් විනා ගී පදමාලාවක් යැයි සමහර විට ඔබට නොසිතෙනු ඇත. එහෙත් මෙම පදමාලාව ගීතයක්ව අකාලික රස මවන සොඳුරු මානව හදවත් තුල ලැගුම්ගත් ගීතයක් වූයේ කෙසේද? එය එසේ වූයේ දිසාසේකරයන් සතු මුකේෂ්ගේ හඬට සමීප ශෝකි ගායනාව හා කුලරත්න තෙන්නකෝන් ගේ ගායනාවට අනුප්‍රාණය සැපයූ සංගීත රචනාවද? ලාංකීය සමාජයේ ප්‍රේමනීය අත්දැකීම් ඇත්තන් සසල කළ මේ ගීතය අවර ගනයේ ගීතයක් යයි එදා මෙදා තුර කිසිවෙකු කියන්නේ නැත.

මෙහි පද ලෙස ඇත්තේ ආලවට්ටන් නැති සැබෑ සෘජු ප්‍රකාශනයකි. එහෙත් මෙය අපූර්ව ගීතයක් වූයේ කෙසේද? කිසිදු තර්කයකින් ඒ එසේ වන්නේ කෙසේද කියා පහදා දීමට මට නොහැකි වුවත් මගේ වඩාත්ම ප්‍රිය වූ ගීත 10 අතර   මෙම ගීතය පවතී. 

අැතැම් විට බොහෝ දෙනාට ජීවිතයේ සැබෑ අත්දැකීම් සමග මේ තරම් සමපාත වී එම හැඟීමම යළි තමා වෙත සම්ප්‍රේෂණය කරන ගිීත ඇත්නම් ඒ අතළොස්සකැයි සිතමි. ඇතැම් විට මේ ගී නිර්මාණය මේ තරම් හෘදයංගම වන්නේ මෙම ගීතයේ නිර්මාතෘවරුන්ටත් මේ අත්දැකීමම තිබුණු නිසා විය හැකිය. එය අසා දැන ගන්නට ගීතයේ පද රචකයා වු එඩ්මන් ජයසූරියවත් ගායක නාරද දිසාසේකරයන්වත් සංගීත රචක කුලරත්න තෙන්නකෝන්වත් අද අප අතර නැත.


'මුලු හදින් මම ඇයට පෙම් කොට' තරම්ම නැතත් මේ කාංසාවම අත්දුටු ගීතයක් මේ නොබෝදා මම අැසීමි.  එහි පද රචිකාව ආචාර්ය සුනන්දා ප්‍රේමසිරිය. සංගීතය අනුරාධ අබේසිංහ ගෙනි. ගායනය හසිත ගනේගමය. 


'විසල් නෙක තුරු මුදුන් පරයමින් නැගී එන

හන්තාන කඳු අරා ලසෝ ලැව් ගිනි අතුල

රිදුම් දී නික්ම යන වියෝවක අකුණු සර

සෙනෙහසේ විඩාබර අවසාන හුස්ම පොද


 හරිත පැහැ තණ පලස් පුරා හැඳි පිණි සේල

දවා දිය කර හරින චණ්ඩ වූ හිරුගෙ තෙද

තැවී පෙම් කුසුම් සොඳ සුසුම් සැඩ කිරණ වැද

සෙනෙහසේ විඩාබර අවසාන හුස්ම පොද


ගං දෑල ඉවුරු වැද තැලී පොඩිවී විසුළ

පියුම් පෙති ගසා යයි සිඳලමින් පෙන කැටිති

සැඩ පහරෙ මදින් මද දියව යයි අතීතය

සෙනෙහසේ විඩාබර අවසාන හුස්ම පොද


මෙම පදවැලෙන් ගීතයක් බිහිව නොමැති වීනම් රචනාවක් ලෙස ගතහොත් මට නම් මෙම පබැඳුම වඩාත් සමීප වෙන්නේ ගීත රචනාවකට වඩා කවියකටය. එහෙත් උචිත තනුවක් විසින් විසින් හසුරුවන ලදුව උචිත ගායනයක් මේ පදවැලට සම්මුඛ වී අප තුල සොඳුරු හා වේදනාබර කාංසාවක් ඇති කරන්නට සමත්ව ඇත. 

ගීත රචනාවක හා ගීතයක බහුවිධ ස්වරූප හඳුනා ගැනීමට මෙම පැරණි සහ අලුත් ගීත දෙක අපූරු උදාහරණ වේ යැයි මම සිතමි. එකී ගීත දෙක සහ නාරද දිසාසේකර වෙනුවෙන් ප්‍රචාරයවූ වැඩ සටහනක් මේ සමග අමුණා ඇත.

No comments:

Post a Comment