ලක්දිව පුරාතන වාරිමාර්ග
ආර් එල් බ්‍රෝහියර් ගේ මාහැඟි කෘතිය ancian irrigation works of ceylon එහි සිංහල පරිවර්තන කාණ්ඩ 5 කින් යුක්ත ව වරින් වර මිනින්දෝරු දෙපාර්තමේන්තුව මගින් එක්දහස් නවසිය තිස් ගණන් වල මුලදී පමණ පළවිය.
මෙහි කොටස් කිහිපයක් අභාවප්‍රාප්ත මලල්ගොඩ බන්දුතිලක මහතා සතුව තිබිණ. ඉතිරි කොටස් මිනින්දෝරු දෙපාර්තමේන්තුවේ තිබී සොයා ගැනීමට හැකි විය. මේ වන විටත් මහවැලි අධිකාරිය විසින් බ්‍රෝහියර් මහතාගේ ඉංග්‍රීසි මුල් කෘතිය එක්දහස් නවසිය අසූගණන්වල නැවත පළ කරන ලදුව එයට අපමණ යහපත් ප්‍රතිඵල ලැබෙමින් තිබිණි.
මෙහි සිංහල කොටස් සියල්ලම එක් කොට තනි කෘතියක් ලෙස ප්‍රකාශයට පත් කිරීමට මවිසින් යෝජනා කළ විට එය ඵල රහිත වෑයමක් වෙතැයි බොහෝ දෙනාගේ මෙන්ම මලල්ගොඩ බන්ධුතිලක මහතාගේ ද අදහස විය. එහෙත් මා ඒ සඳහා තවදුරටත් වෙහෙසුනෙමි. අවසානයේ එවකට මහවැලි අමාත්‍යවරයා වූ මෛත්‍රීපාල සිරිසේන මහතා ඒ සඳහා අනුමැතිය දුන්නේ ය. මගේ සංස්කරණයකින් යුතුව එම කෘතිය 2001 වසරේදී ලේක්හවුස් ආයතන මුද්‍රණාලයේ මුද්‍රණය වෙමින් තිබියදී පැවති ආණ්ඩුව බිඳ වැටුණේය. ශ්‍රී ලංකාවේ දේශපාලන සංස්කෘතිය අනුව ආණ්ඩු මාරුවකදී පැරණි පාලනයේ ව්‍යාපෘතිවලට වන ස්වභාවික ගැහැට 'ලක්දිව පුරාතන වාරිමාර්ග' කෘතියටද අත්විය. වසරකට අධික කාලයක් මුද්‍රණ කටයුතු නැවතී එය ලේක්හවුස් මුද්‍රණාලයේ හමස් පෙට්ටියට වැටී තිබිණි.
මෙසේ සිටින විට අභිනව විෂයභාර ඇමතිවරයා ලෙස පැමිණි ගාමිණි ජයවික්‍රම පෙරේරා මහතා හමුවීමට මට ලැබුණු ඉතා කුඩා අවසරයකින් එතුමාට මෙම කෘතියේ අද තත්වය පැහැදිලි කිරීමට අවස්ථාව ලැබිණි. එතුමාගේ අවසරයද ලදුව යළි මුද්‍රණ කටයුතු ඇරඹී 2002 මැයි මස 17 වන දින කෘතිය දොරටු වැඩුණි.
එදා ඓතිහාසික දිනයකි. පොතේ කතුවර බ්‍රෝහියර් මහතාගේ මිණිබිරිය වූ ඩැල්රීන් බ්‍රෝහියර් මැතිණිය හා පොතේ සිංහල පරිවර්තකයා වූ එල්.පියසේන මහතාගේ දියණිය වූ ශ්‍රීමා දිසානායක මැතිනිය සමසුන් ගත් උත්සවයකදී මහවැලි කේන්ද්‍රයේ දී 'ලක්දිව පුරාතන වාරිමාර්ග' සම්පූර්ණ කෘතිය ප්‍රකාශයට පත්විය.
මේ ගැන අද මට ලියන්නට සිත් වූයේ ජැක්සන් ඇන්තනි අධ්‍යක්ෂනය කළ ගග දිගේ වාර්තා වැඩ සටහන් මාලාවේ මේ කෘතිය නිතර පරිශීලනය වනු දැක ඒ ගැන සංතෝෂයෙනි.
ලක්දිව පුරාතන වාරිමාර්ග කෘතිය සංස්කරණය කිරීමට ලැබීම මගේ ජීවිතයේ ලද මහත් භාග්‍යයක් ලෙස සලකමි. ඒ සඳහා මවෙත සහයවූ සුධීමතුන් සියලුම දෙනාට දහඅට වසරකට පසුවත් මම ස්තුති වන්ත වෙමි.
මෙහි පහත පළවන්නේ 1934 දී මෙහි සිංහල පරිවර්තනයේ පළමු කාණ්ඩයට එවකට ගොවිකම් සහ ඉඩම් අමාත්‍ය ඩී.ඇස් සේනානායක මහතා විසින් ලියන ලද පෙරවදනයි. එදා දේශපාලකයන් මෙවැනි ශාස්ත්‍රීය කටයුතු කෙරේ දැක්වූ ආකල්පය වටහා ගැනීමට මෙම පෙරවදන මහෝපකාරීවනු ඇතැයි සිතමි.
-චන්ද්‍රරත්න බණ්ඩාර
ප්‍රාරම්භය
ලංකාවේ අතීතය ගැන අප දන්නා කරුණු වලින් විශාල කොටසක් ආණ්ඩුවේ පාලක සහ කාර්මික දෙපාර්තමේන්තුවල නියුක්තව සිටි නිලධාරීන් විසින් රැස් කරන්නට යෙදුණු බව නොයෙක් තැන්වල සඳහන් වී තිබේ. ආන්ඩුවේ නිලධාරීන්ට අස්ථානයේ දෝෂාරෝපණය කරන්නේ යැයි චෝදනා ලැබ සිටින මම ද ඉහත කී සත්‍යය තව වරක් සඳහන් කිරීමට ප්‍රීති වෙමි.
මෙම නිලධාරීන් කෙරෙහි අපි ණයගැත්තෝ වෙම්හ. පඩි කෑමෙන් හෝ පඩි සම්බ කිරීමෙන් තෘප්තියට නොපැමිණියා වු මේ නිලධාරීහු ස්වකීය තනතුරුවල නියුක්ත ව සිටීමෙන් ලැබූ සෑම අවස්ථාවලින්ම ප්‍රයෝජන ගනිමින් පුරාතන දේවල් ගැන වග විභාග කර බැලූහ. එසේ වගවිභාගකර රැස් කරන්නට යෙදුණු කරුණු රාශියක් ඒ නැතිවී ගොස් තිබෙන ශිෂ්ටාචාරය අනාවරණය කිරීමට බෙහෙවින් ප්‍රයෝජනවත් වේ.
නිලධාරීන් විසින් නොයෙක් අවස්ථාවල ප්‍රකාශයට පමුණුවන්නට යෙදුනු ග්‍රන්ථයන් හැර ආණ්ඩුවේ දෙපාර්තමේන්තුවල තබා තිබෙන පොත් පත් වලින් ද අගනා කරුණු රාශියක් රැස් කිරීමට පුළුවන් වන්නේ යැයි මම විශ්වාස කරමි. අවුරුදු පනහකට පමණ පෙර රාජකීය ආසියාතික සමිතියේ රැස්වීමකදී වරක් එහි මූලාසනයට පත් සිටි ආර්.එස් කොපල්ටන් දේවගැතිතුමා ආන්ඩුවේ නිලධාරීන්ගේ දිනපොත් බැලීමට සමිතියේ සාමාජිකයන්ට අවශ්‍ය අවකාශ ලබා දීම ගැන ආණ්ඩුකාරතුමාට ස්තුති කළේය. ශාස්ත්‍රීය කරුණු පිළිබඳ සාකච්ඡාවලදී මේ දින පොත් වලින් බොහෝ ප්‍රයෝජන ලැබෙන බවද එතුමන් විසින් විසින් සඳහන් කොට ඇත.
අපේ රටේ පුරාතන ශිෂ්ටාචාරය ගැන සොයා බැලීමට බලාපොරොත්තු වන්නන්ට ප්‍රයෝජනවත් විය හැකි කාරණා රාශියක් මේ මැනීම් දෙපාර්තමේන්තුවේ පොත්පත්වල සඳහන් වී තිබෙන බව මට දැනගන්නට ලැබී තිබේ. තවද ඉහත කාලවල මැනීම් දෙපාර්තමේන්තුවේ නියුක්තව සිටි උද්යෝගයවත් නිලධාරීන් අනුගමනය කරන බ්‍රෝහියර් මහතා වැන්නෙකු මේ ග්‍රන්ථය සම්පාදනය කිරීමට ඉදිරිපත් වීම මහත් වාසනාවකි. පුද්ගලික වශයෙන් නොයෙක් වෙහෙස මහන්සි දරා ඒ මහතා මේ ග්‍රන්ථය සම්පාදනය කිරීමට ඉදිරිපත්ව සිටින බව සඳහන් කළ යුතුව තිබේ.
මහජනයා ඉදිරියේ තබනු ලබන මේ ග්‍රන්ථයට ඉතා මෑතදී සොයා ගන්නට යෙදුන කරුණු රාශියක් ද අධික මිල නිසා දුර්ලභ වූ පොත්වල පමණක් දක්නට ලැබෙන කරුණු රාශියක්ද අඩංගු වී තිබෙත්. පුරාතන වාරිමාර්ගයන් පිළිබඳ කරුණු නොයෙක් තැන්වලින් රැස්කොට ප්‍රබෝධජනක ආකාරයට බ්‍රෝහියර් මහතා මෙහි දක්වයි. තවද සර් හෙන්රි වෝඩ් උතුමාණන් වහන්සේගේ සවිස්තර වාර්තා වලින් උපුටා නොයෙක් දේවල් මේ ග්‍රන්ථයේ දක්වා තිබීම අපේ විශේෂ සතුටට කාරණයක් වේ.
අප රටවාසීන්ගේ ආදරය යම් ආණ්ඩුකාරයෙකුට හිමිවිය යුතු නම් සර් හෙන්රි වෝඩ් උතුමාණන් වහන්සේට එය නිසැකයෙන්ම හිමි විය යුතුයි. පාටකල කන්නාඩිවලින් නොව ස්වකීය නෙත් යුවලින්ම රට පරීක්ෂාකර බලමින් තමාට ආණ්ඩු කිරීමට නියම වූ මනුෂ්‍යයන්ගේ තත්ත්වය නියම දේශපාලන විභාග කර බැලූ මෙතුමෝ තමන්ට පෙර සිටි ආණ්ඩුකාරයන් ගේ නොසැලකීම නිසා විනාශ මුඛයට පත්ව තිබූ ගොවි කර්මාන්තය දැක ශෝකයට පත් වූහ. බ්‍රිතාන්‍ය ආණ්ඩුව රටේ ආදායමින් සැලකිය යුතු කොටසක් කිසි කලෙකවත් පුරාතන කර්මාන්තයන් ප්‍රකෘතිමත් කරවීමට නොයෙදූ බව ද දේශගුනය නිසා අතිශයින්ම උවමනාවූ මේ වාරිමාර්ගයන් ප්‍රකෘතිමත් කිරීම මෙන් සිංහලයන්ගේ සිත් තුළට කාවදින අන් කිසිවක් නැති බව ද මෙතුමාට මනා ලෙස අවබෝධ වූයෙන් නිසරු ප්‍රදේශයන් සාරත්වයෙන් බැබළවීම පරමාර්ථකොට ඇති ක්‍රියාපටිපාටියක් ආරම්භ කළහ. වර්තමානයේ දක්නට තිබෙන වාරිමාර්ග පිළිබඳ සෑම කටයුත්තක්ම උතුමාණන් වහන්සේගේ ව්‍යාපාරය නිසා ඇති වූයේ යැයි සලකන්නට පුළුවන.
පුරාතන විශ්මය ජනක කර්මාන්තයන් කෙරෙහි අප රටවාසීන්ගේ යොමු කිරීම මේ ග්‍රන්ථය ප්‍රසිද්ධියට පැමිණිවීමේ මුල් අදහස වේ.
විශාල රාජ්‍යයන් පමණක් දියුණුව තිබෙන වර්තමාන කාලයේ කුඩා ජාතීන් විසින් ලොවට සලසා තිබෙන සෙත අමතක කර දැමීමට ඉඩ තිබේ. මේ කුඩා ජාතීහු ද ලොවට තව වරක් සෙතක් සැලසීමට අසමර්ථවන්නාක්මෙන් මන්දෝත්සාහී වෙත් . අපේ පුරාතණ මහඟු කර්මාන්තයන් ගැන දැනගන්නට ලැබීම මේ දුර්වල ගති නැති කර දැමීමට එකම මාර්ගය වේ.
විශාල රාජ්‍යයන් පමණක් දියුණුව තිබෙන වර්තමාන කාලයේ කුඩා ජාතීන් විසින් ලොවට සලසා තිබෙන සෙත අමතක කර දැමීමට ඉඩ තිබේ. මේ කුඩා ජාතීහුද ලොවට තවවරක් සේවය සැපයීමට අසමර්තවන්නාක් මෙන් මන්දෝත්සාහී වෙත්. අපේ පුරාතන මහගු කර්මාන්තයන් ගැන දැන ගන්ට ලැබීම මේ දුර්වල ගති නැතිකර දැමීමට එකම මාර්ගය වේ.
ඝන යාර 17 කෝටියක් පමණ විශාල වූ වෑකණ්ඩියක් අපට දක්නට තිබේ නම්, එවැනි වෑකණ්ඩියක් සෑදීමට දැන් කාලේ මුදලින් පවුම් 1,300,000 ක් පමණ වුවමනා වේ නම්, ඒ මුදලින් හැතැප්ම 120ක් දිග රේල් පාරක් එන්ගලන්තයේ දී සාදන්නට පුළුවන් වේ නම්, තවද එවෙනි වෑ කණ්ඩි එකක් පමණක් නොව බොහෝ ගණනක් දක්නට තිබේ නම්, නූතන ශිල්ප විශේෂඥයෙක් 'මා නියුක්තව සිටි රක්ෂාව නිසා පුරාණ කර්මාන්තයන් ගැන ඉතා සියුම් ලෙස පරීක්ෂා කර බැලීමට අවකාශ ලැබුණන් මේ මහඟු කර්මාන්තයන් සෑදූ ශිල්පීන්ගේ ඥානය සහ කාර්යක්ෂම භාවය කෙරෙහි දැක්විය යුතු ගෞරවය නොසගවා ප්‍රකාශ කරමි යයි කියා තිබේ නම්, තව ද මේ කර්මාන්ත වල සාවද්‍ය වශයෙන් සලකනු ලැබූ යැයි යම් යම් ස්ථානයන් ද නිරවද්ය බවත් ආදීම ශිල්පීන්ගේ අදහස් වරදවා තේරුම් ගැනීමෙන් ඒ ඒ තැන් සාවද්‍ය වශයෙන් පෙනී ගිය බවත් පසු කාලයක දක්නට ලැබුනේ නම්, මේ වාරිමාර්ග සෑදීමට උවමනා වූ විශාල ජන සංඛ්‍යාව මිසර දේශයේ පිරමීඩ්ස් සෑදීමේ දී ඇතිවූ මහජනත තාඩනපීඩනාදියෙන් තොරව පොදු යහපත උදෙසාම ඇති කරවන්නට යෙදුන කටයුතු පිළිවෙළකින් ලබාගන්ට යෙදුනේ නම්, එසේම අපේ පරිහානිය ඇති වූයේ ''අප ජන සමාජයට අත්තිවාරමක් වූ විධිවිධානයන් බිඳහැර පොදු යහපතට අදාළ වන කර්මාන්තවලදී ජන සමාජයේ ඒකාබද්ධ වීර්යය යෙදවීමේ පිළිවෙත් විනාශ කර දැමූ කරුණුවලින් බවත් අපි කල්පනා කරමු නම්, කල්පනා කරමින්ම නැවත නැවතත් අතීතය ආදර්ශයට කොට ගනිමු නම්, අනාගතය ගැන කනස්සල්ල වීමට අපට කරුණක් නැත.
අපි අපේ මුතුන්මිත්තන් කෙරෙහි පැවති ප්‍රබලකම් හා දුබලකම් වලින් සමන්විත වම්හ. ඒ දුබලකම් නැතිකර දමා ප්‍රබලකම සුරක්ෂිත කිරීමට කාලය තවම ඉකුත්ව නොගියේ යැයි මම තරයේ විශ්වාස කරමි.
මේ සිංහල පරිවර්තනය කළ ශාස්ත්‍රාචාර්ය එල්.පියසේන මහතාට ද ඊට ආධාර කළ ආචාර්ය ජී.පී.මලලසේකර මහතාට ද මම ස්තූතිවන්ත වෙමි.
ඩී.ඇස්. සේනානායක
ගොවිකම් සහ ඉඩම් පිළිබඳ අමාත්‍යතැන
වර්ෂය 1934 ක් වූ නොවැම්බර් මස 25 වැනි දින
No comments:
Post a Comment