මේ ලියන අද පරණ අවුරුදු දිනයයි. වෙනදා ලංකාවේ අපේ ඇත්තෝ පරණ අවුරුදු දා හැසුරුණු විදිහට නෙවෙයි අද හැසිරෙන්නෙ. නගර වශයෙන්, ගම් වශයෙන්, නිවෙස් වශයෙන් ලොක්ඩවුන් වෙලා. අපි නොතකා හැරිය ජීවිතයට අදාල සංස්කෘතික නියාමනයන් හේතුවෙන් මේ ලොක්ඩවුන් ජීවිතයට අර්ථයක් සොයාගැනීමේ අපහසුව විවිධාකාර වේශයන්ගෙන් ආරංචි වශයෙන් සමාජයේ පැතිරෙනවා. ප්‍රේමයෙන් ඔබ්බේ විවාහ ජීවිතය තුල අවුරුද්දකින් දෙකකින් එහාට අතීතයේ එක්කල ස්නේහයට පැවැත්මක් නොමැතිව ලතවෙනවා. ගෘහස්ත ප්‍රචංඩත්වය වැඩිවීම ඒ සඳහා හොඳ උදාහරණයක්.
අපගේ සංස්කෘතික ක්‍රියාධරයන් සිය සක්‍රිය ජීවිතයේදී අපේක්ෂාවන් වෙත හඹා යාම තවදුරටත් පුරුදු වේගයෙන් කළ නොහැකි අරුම පුදුම විරාමයක් ගත කරමින් සිටින්නේ. තමාගේ පැරණි පිංතූර, තමා සන්තක පොත පතෙහි පිංතූර,පලකරමින් තම ජීවිත මතක නිස්කලංක මනසකින් සටහන් කරමින් මේ ලොක්ඩවුන් ජීවිතය ගෙවා දමනවා. තමන්ගේ සක්‍රිය ජීවිතයේ වැඩකට නොගත් නමුත් සිය ආත්මය තුල 'අහිංසකකම' සුරැකිව පවතින බවට මේ සියල්ල හොඳ උදාහරණ. මට හිතෙන විදිහට කොරෝනාවෙන් පසු අපට විවෘතවන නව ලෝකයට මේ යාවත්කාලීන කරගන්නා අහිංසකකම පුයෝජනවත් වේවි.
මේ ලොක්ඩවුන් සමයේ අපේ අතීතයේ සුන්දර තැන් සොය සොයා සුමුදු ලෙස පිරිමදිමින් ඇතුලට හැරුනු ජීවිතයක් ගතකරන අතරේ වෛරසයම වාසියක් කරගනිමින් අපේ රට නව දේශපාලන රටාවකට දැනුවත් පිඹුරුපතක් සැකසෙමින් තිබෙනවා. ඒ සඳහා පදනම් දේශපාලන බලවේගයේ මතවාදී ආයුධ ගබඩාව පන්සල්වල හෝ වෙනත් තැනෙක ස්ව කැමැත්තෙන් ලොක්ඩවුන් වී සිටිනවා.බලය ලබාගන්නා තෙක් පමණක් ප්‍රයෝජනවත් වූ ඒ වාචාල දේශප්‍රේමී උසිගැන්වීම් බලය ලබාගත් දේශපාලන ප්‍රවාහයකට තවදුරටත් වැදගත් නැති 'වැඩ අලකරන" බලවේගයක් පමණයි.
එකිනෙකා කාකොටා ගනිමින් අසපු, සමන්ත්‍රභද්‍රලා අවසන් වශයෙන් සිය අනුගාමී මහ සෙනගට ඒත්තු ගැන්වූයේ එක දෙයක්. ඒ එක දෙය දේශපාලනිකව ශක්තිමත් වි බලය බවට පත්වී තිබෙනවා.
කොරෝනා වෛරසය අස්සේ ලොක්ඩවුන් වූ ජීවිත ආණ්ඩුවේ හා ආණ්ඩුවට ලැදි මාධ්‍ය ඔස්සේ පමණක් තොරතුරු ලබාගනිමින් සිටියදී තවමත් පවතින දුබල ප්‍රජාතන්ත්‍රවාදී ගති ලක්ෂන පවා මිරිකා හරින අධිපතිවාදයක් ඒ පිඹුරු පත්හි සැකසෙමින් පවතිනවා.
කැපවීමෙන් දේශපානීක නොවූ එහෙත් සිය සිය සංස්කෘතික ජීවිතයේ කොටසක් ලෙස දේශපාලනයට සංනව්දී වූ පිරිස්වලට අප ආරධනා කරන්නේ ලංකාව තුල සිදුවන මෙම නව පෙලගැසීම් ගැන සංවේදී වන ලෙසයි.
කථිකාචාර්ය සුමිත් චාමින්දයන් විස්තර කරන'කොරෝනාවෙන් පසු අපට හමුවන අනාගත ලෝකය' මේ සියලු තත්වයන් බැරෑරුම්ව හඳුනාගතහැකි අගනා ලිපියක්. එය පහත ලිංකුවෙන් කියවන්න.
https://agamya.lk/blog/9139-2020-04-11-10-57-49?fbclid=IwAR3zCnGh7fXbyHGFFj_0TmKnULp2Ta5ZTyLEBj-QCje_VOqL19cfM-bZEj0
No comments:
Post a Comment