මහාචාර්ය පී.බී.මීගස්කුඹුර මහතාගේ ශාස්ත්‍රීය සම්ප්‍රදානය ගැන එතුමාගේ ශිෂ්‍ය භික්ෂූන් තිදෙනෙකු විසින් සම්පාදනය කරන ලදුව විදර්ශන ප්‍රකාශකයන් විසින් ප්‍රකාශයට පත්කරන කළ පී බී මීගස්කුඹුර ලේඛනාවලි කෘතිය එළිදක්වන උළෙලේ දී එතුමන් කළ සංවේදී කතාව අසමින් මෙය ලියැවිණි. එතුමා මෙතරම් කායික දුබල ව සිටීම මට මහත් සංවේගදායක කාරණයකි. එහෙත් එතුමාගේ නිරෝගී මතකය හා ජීවන දර්ශනය කිසිදු ලෙසකින් දුබල වී නොමැති බව මේ කෙටි දේශනයම දෙස් දේ ..
එතුමා අපේ පවුලේ ගෞරවනීය හිතවතෙකි. එකළ කොළඹ-නුවර යනෙන වාරයක් පාසා පොල්ගහමුල එතුමාගේ නිවසට ගොඩ වී යාමේ පුරුද්දක් තිබිණ. එතුමන් විසින් රචිත' සිරිලක වැදිජන පුරාණය' 'මකුට මුනිධාරී අවලෝකිතේශ්වර නාථ ලංකා පුරාණය' තෝමස් බන්ඩල් විසින් රචිත mask නමැති කෘතියේ වෙස්මුහුණු නැමැති පරිවර්තනය යන කෘතීන්හි ප්‍රකාශකයා වූයේ ද මම ය. (මගේ පිනිදිය ප්‍රකාශන ආයතනය)
එතුමාගේ කතාවේදී තමාගේ ජීවන පිළිවෙත මේ යැයි පැවසීමට උදාහරණ කොට දැක්වූ "
''අක්‍රෝධ මාරෝග්‍ය ජිතෙන්ද්‍රියත්වං
දයාක්ෂමා සර්ව ජනප්‍රියත්වං
නිර්ලෝභි දාතා භය ශෝක මූර්තෙක්
ඥානක්ප්‍රබේදා දශ ලක්ෂණානි'' ශ්ලෝකයේ සඳහන් ගුණ සමුදායම ඔහුගේ ගුරු ජීවිතයේ දීත් පෞද්ගලික ජීවිතයේදීත් එත්‍රමා විසින් පවත්වාගෙන ගියේය.
ලංකාවේ ශ්‍රාස්ත්‍රීය සමාජය මේ තරමින් හෝ පැවැත්මට හා ලංකාවේ විශ්ව විද්‍යාල වල තත්වය මේ තරමින් හෝ රැකීමට මීගස්කුඹුර මහතා වැනි ශ්‍රේෂ්ඨ බුද්ධිමතුන් ගේ සමස්ත වෘත්තිය ජීවිතය විසින් ලබාදුන් සම්ප්‍රදානයන් මහත්සේ බලපෑවේය. විශ්වවිද්‍යාල ක්ෂේත්රයේ කල්ලි කණ්ඩායම් ලෙස බෙදීම, ගුරුවරුන්ගේ විනය පිරිහීම, පර්යේෂණ කාර්යයේ උනන්දු නොවීම ගැන එක්දාස් නවසිය අනූ ගණන් වල ම පාහේ එතුමා කතා කළේ කනස්සල්ලෙනි.
එතුමාගේ සාස්ත්‍රීය ලිපි මාලාව මෙසේ පළ කිරීම පිළිබඳව එහි සංස්කාරකවරුන් වන දඹුල්ලේ සුධම්ම, පිටතලාවේ විමලසාර, අපරැක්කේ සිරිසුධම්ම හිමිවරුන්ටත්,ප්‍රකාශක ජනක ඉනිමංකඩ සොයුරාටත් ස්තුතිවන්ත වෙමි. මහාචාර්ය ගනනාත ඔබේසේකර, ආරිය රාජකරුණා, කේ.එන්.ඕ.ධර්මදාස හා ජේ.බී. දිසානායකයන් වැනි වියතුන් කිහිප දෙනාගේත් කෘති මේ ආකාරයට සම්පාදනය වේ නම් ඒ මහඟු සේවාවකි. මහාචාර්ය මීගස්කුඹුර මහතාගේ කෘතියට ලැබුණු පාඨක ප්‍රතිචාරය ම යහපත් වීම ඔබව දිරිමත් කරනු ඇතැයි සිතමි.
සිය සම්පූර්ණ ශාස්ත්‍රවන්න ජීවිතයේ දී අබැටක අවමනක් ලැබෙන අකටයුත්තක් නොකළ මේ විශිෂ්ට ගුරුදෙවියාට දීර්ඝායු ලැබේවා.
-චන්ද්‍රරත්න බණ්ඩාර
